سوموار، 1 اپریل، 2013

ایک تاکید

ویکھ پتر!۔
توحید نوں بڑی مضبوطی نال پھڑ کے رکھیں  ۔
اے بڑی کامیابی دی کنجی اے  ۔
اک توحید ای ایسی چیز اے جو بندے نوں  اپنی صلاحیتاں نال اگے ودھن دا حوصلہ تے زور دیندی اے۔
بندے نوں ایتل اوتل دیاں چیزاں تے امیداں لا لا کے مایوس ہون توں بچاندی اے ۔
اک اکیلے رب تے یقین رکھیں کہ او ہی تیری عقل وچ پائے گا کہ کسے وی مصیبت وچ کی کرنا ایں ۔
پتر !۔
جے توں اک الّلہ تے ہی امیداں رکھیں گا تے تینوں اس گل دا وی پتہ لگے گا کہ
کم تینوں آپنے کم ،  اپی ہی کرنے پئین گے ۔
جے کدی تینوں کدی کوئی دہریہ اے اکھے! کہ رب کوئی نئیں  ۔
تے تون ایس نال بحث ناں کریں ۔
توں کہہ دئیں
کہ ہاں ہو سکدا اے کہ رب ناں ہی ہوئے
پر میں اپنے کم چلان لئے اک فرضی رب بنا رکھیا ہویا  اے۔
ہو سکدا اے کدی تیرے دل وچ وی اے گل جڑ پھڑ لے کہ رب کوئی نئیں
تے فیر وی جے توں عقل کولوں کم لوئیں
تے
اک رب نوں اپنا رب بنائی ای رکھیں ۔
یاں توں میری گل من لوئیں
تے اک رب تے یقین رکھیں۔
ناں کسے ہور تے امیداں لائیں تے ناں سمجھیں کہ کوئی تیریاں مراداں پوریاں کرے گا
تے فیر توں ویکھیں
کہ توں
آپ ، دوجیاں دے کم اون جوگا ہو جائیں گا۔
پر پتر نری توحید نال تیرے کم تے کاروبار نئیں چلنے۔
ایس لئی
توں انج کریں کہ
جھوٹ ، لالچ ، چوری ، جوئے،حسد، نشے تے بسیار خوری توں انت دا پراں رہویں ۔
اے جیڑیاں ست چیاں میں تینوں دیسیان نے
تو ں
ایہاں تو بہت ہی بچناں اے
تے لوکاں نوں اے دسنا ایئں
کہ
میرا رب اینہاں چیزاں توں منع کردا اے
ہوسکدا اے کہ رب ہووے کہ ناں
پر
اینہاں ست چیزاں تو بچ کے
سخت محنت نال توں اپنے زمانے دا امیر بندہ بن سکنا ایں
ہو سکدا اے تینون سارے مذہب ڈرامے لگن
پر
اے اک حقیت اے کہ
ایس کائینات نوں کسے نے بنایا ضرور اے
تے اوس نوں کسے وی ناں نال سد کے
توں
توحید نال چمڑیا رہویں
تے اپنی اولاد نوں وی اے دسدا رہویں۔
پتر! شرک ، ساریاں بیماریاں تے ناکامیاں دی جڑ ای
پتر شرک دی ڈیفینیشناں وچ ناں پوئیں
بس
اینی گل یاد رکھیں کہ رب ایک تے اکیلا اے
تے بڑا ای پالن ہار اے
رب دا حکم سمجھ کے
جھوٹ ، لالچ ، چوری ، جوئے،حسد، نشے تے بسیار خوری ، دے نیڑے نئیں جانا۔
توں اپنے اندر چاتی پاء کے ویکھیں کہ
اک رب تے یقین نال تیرے اندروں بڑے جہے ڈر نکل جان گے ۔
اک رب تے یقین رکھ کے توں او کتاباں ضرور پڑہیں
جنہان کتاباں نوں اسمانی کہیا جاندا اے
تے نالے جے تینوں  مل جان تے اونہاں لوکاں دیاں لکھیان ہویاں باتاں وی ضرور پڑہیں
جنہاں نوں ، لوک “رب” من دے نے یا “رب جہیا” من دے نے
پر پتر اینہاں دیاں گلاں تے ضرور غور کریں  پر اینہاں لوکاں دی عقیدت وچ ناں پے جائیں
کہ
او وی تیرے جہے انسان سن  ،
تے رب نے عقل تینوں وی دتّی اے
ویکھ پتر جھوٹ نئیں بولنا
لوک تیرے تے اعتبار کرنا چھڈ جان گے
تے پتر کوی وی بندہ ایڈا امیر نئیں ہوندا کہ
 تجارت کرئے تے ساری منڈی دا مال خرید سکے
توں جھوٹ توں بچ جاوئیں گا
تے لوکاں دے پیسے نال کاروبار کر سکیں گا
جے توں نالے لالچ کولوں وی بچ جاویں گا
تے
لوک تیرے کول اپنا مال رکھ جان گے
تے اونہاں وچوں بڑے جہے منگن وی نئیں اون گے۔
پر توں لالچ فیر وی ناں کریں ۔
تے ایس طرحاں تو منڈیاں دا بوہتا مال خریدن جوگا ہو جاوئیں  گا ۔

توں چوری نئیں کرنی
نئیں تے تیرے وچوں محنت کرن دی روشنی نکل جائے گی
تے پتر جیہڑے بندے وچوں محنت دی روشنی نکل جائے اوس دیاں نسلاں تک برباد ہو جاندیاں نی۔
تے بندے وچوں محنت دی روشنی مکان والیاں چیزاں وچوں سب تو وڈی چیز
اے
سود
تے چوری۔
تے جوّا
سود پتر نئیں کھانا۔
سود تیریاں اون والیاں نسلاں نوں مانگت(بھکاری) بنا دے گا۔
حسد نئیں کرنا پتر
توں محنت کرنی اے
تے تیرے کول وی او سب کجھ ہوئے گا
جو کسے ہور کول ہو سکدا اے۔
نشہ تے بسیار خوری
تیرے جسّے(جسم) نوں کھا جان گے
جے توں اپنی جوانی توں لذتاں کشید کرنیاں چاہناں ائیں تے
اپنا بڑھاپا سوہنا گزارنا چاہنا ائیں تے
نشے تے بہتا کھانا کھان توں بچ جاوئیں۔
توحید نوں منن والا بن کے تے
جدہوں وی چنگے تے مندے دی گل ہوئے تے!!۔
لڑائی نوں کدی مندا ناں سمجھیں۔
توں ظالم نئیں بننا
پر لڑائی لئی ہر وقت تیار رہنا ائیں۔
ایسے لئے میں تینون نشے توں وی منع کرنا واں کہ
اے ناں ہوئے کہ لڑائی سر آ پوئے
تے
توں
نشے وچ ای ماریا جاوئیں
لڑائی ناں ای بری چیز اے تے ناں ای گناھ اے
ظلم بری چیز اے تے
ظلم  گناہ وی اے!
ظلم ناں کرئیں تے ،  تے ناں ای ظلم برداشت کریں۔
پتر ۔  ظلم برداشت کرکے جیون نالوں  مر جاوئیں!!!۔
پتر میں تینوں اک واری فیر اکھاں گا
توحید نوں ناں چھڈیں
تے شرک دے نیڑے ناں جاوئیں
تیریاں عقیدتاں ، پرستشاں ، عبادتاں ۔ دعاواں سبھی اک اللہ لئے ہونیاں چاہی دیاں نے ۔
پتر میری گل نوں سٹ ناں پاوئیں
تے اے گلاں اپنی اولاد نوں وہی دس دا رہوئیں تے اینہاں تو
تاکید کریں کہ اے گلاں اپنی اولاد نوں وی ضرور دسن ۔

3 تبصرے:

ابو عبد اللہ کہا...

"جیہڑے بندے وچوں محنت دی روشنی نکل جائے اوس دیاں نسلاں تک برباد ہو جاندیاں نی"
بہت اعلی تحریر، ہر پیو نوں چاہیے دا اے کہ اپنے کالج جان والے پتر نوں اے یاد کروائے- اور پتر نوں بھی چاہے دا اے اے گلاں پکی طراں پلے بن لے-

درویش خُراسانی کہا...

خاور صاحب یہ اتنی لمبی نصیحت کس کو کی ہے۔مجھے تو پنجابی سمجھ نہیں آئی لیکن یہ محسوس ہوا کہ شائد نصیحت ہی ہوگی۔

Baba ji کہا...

تیریاں عقیدتاں ، پرستشاں ، عبادتاں ۔ دعاواں" سبھی اک اللہ لئے ہونیاں چاہی دیاں نے "

بہت ای خوبصورت تے واضح گل اے

Popular Posts